Hayâlinden gelir gam hâtıra cânâneden gelmez
Sitem hep âşinâlardan gelir bî-gâneden gelmez
Umarsan bir nevâziş açdığı bin zahm için ammâ
Bu insâniyyet ey dil gamze-i cânâneden gelmez
Hased evkâtına ol ârif-i âlem-şinâsın kim
Elinden câm düşmez kûşe-i meyhâneden gelmez
Misâl-i halka tutdum gûşumu ebvâb-ı âfâka
Sadâ-yı nağme-yi ayş ü tarab her hâneden gelmez
N’ola güstâh olursa pîş-i gülde bülbül ey Nâbî
Mürâat-ı edeb dest-i dil-i mestâneden gelmez
Nâbi Efendi
